ПАЙДАЛЫ КЕҢЕСТЕР

Бұл қарапайым ұйқы ережелерін міндетті түрде әдетке айналдырыңыз!

Қазіргі таңда барлығымыз ұйқыны демалыс емес, қажеттілік деп санаймыз. Нәтижесінде ұйқыға салғырт қарап, оның сапасын әлдеқайда төмендетеміз. Ұйқының уақыты, орны, ұзақтығы сынды қасиеттері сақталған жағдайда ғана түнгі ұйқы сіз үшін нағыз демалыс бола алады.

Ұйқысы қанбай, жаман ұйықтайтын адамдардың қатарында сіз де болсаңыз, қарапайым бірақ көбіміз ұмытатын ұйқы ережелерін әдетке айналдырып көріңіз. Бір-екі аптадан кейін-ақ ұйқыңыздың сапасы жоғарылап, таңертең жақсы көңіл күймен оянатын боласыз.

Ересек адамға ұйқысы қану үшін 7-9 сағат қажет. Сондықтан егер сізге таңмен сағат 7-де ояну керек болса, түнгі 10-11-де ұйқыға жату керектігі түсінікті. Ұйқыға ерте жата алмай жүрсеңіз, мына жаттығуды орындап көріңіз. Бір апта бойы ұйқыға үйреншікті уақыттан 15 минут бұрын жатып жүріңіз. Келер аптада бұл уақытты тағы 15 минутқа алдыға жылжытыңыз. Ұйқы уақытын күн тәртібіңізге қарай реттесеңіз, қаншалықты ерте тұрсаңыз да, ұйқыңыз қанатын болады. 

Сізге ұйқыңыз қану үшін қанша уақыт қажет? Ол үшін шаршамаған күні ертерек тамақтанып, сағат кешкі 10-да ұйқыға жатыңыз. Келесі күні оятарсыз қай уақытта тұрғаныңызды есте сақтаңыз. Міне сізге демалу үшін дәл осынша уақыт қажет.

Сондай-ақ сапалы ұйқы үшін бөлмеңізде 18-22 С градус температурасы болуы тиіс. Сондықтан ұйқы алдында бөлмеңізді таза ауамен желдетуді күнделікті әдетке айналдырыңыз.

Ұйқыға жатқанда бөлмеңіздегі барлық электронды құралдарды сөндіріңіз. Олардың қатарына тек теледидар мен ноутбук қана емес, сондай-ақ телефон, смартфон, планшеттер де кіреді. Біздің ми электронды құралдардың мониторындағы жарықты байқап, әлі күн деп ойлайды. Нәтижесінде түнде ұзақ ұйықтай алмай, күн тәртібіңіз бұзылады.

Осылайша қарапайым бірақ әсерлі ережелерді ұстансаңыз, ұйқыға байланысты ең үлкен мәселелердің бірін шешесіз. Ал таңмен ояну сіз үшін енді қиын болмайды.

Ұқсас мақалалар

Back to top button
error: Content is protected !!